搜尋
  • Admin

一個有效十年的恒指策略(蔡嘉民)


最近留意倒大市有個現象,特別係上星期,成日出現高開低收嘅情況,無啦啦夾高開市,嗰一刻就係全日嘅最高點,跟住期指就會不斷向下探,下午先至出現全日低位,形成一支陰燭。有啲人會話因爲美國股市隔夜做好,所以香港跟隨高開,但不幸內地股市偏弱,令恆指日內跟跌,所以形成呢個Pattern。曾經有一排會唸,如果相信大戶可以控制股市,最容易控制倒嘅,應該係開市價。一旦基於大戶會控制股市,高開其實唔難,只需要一手喺競價時段,喺同一個價位大量放出買盤,另一邊同時喺同一個位放賣盤,就可以成功Mark價,就好似當年Mark低匯豐(0005.HK)股價去到$33咁。


咁點解佢地要咁做呢?對佢地又有咩好處呢?曾經有好多人話係挾高沽貨,包括好多黎上堂嘅同學仔。因為高開挾高完就可以高位掟貨。經過一輪回測(Backtest)之後,發現事實正好相反。

實在有太多坊間策略,聽落好合理,但一拎歷史數據測試,就會發現結果截然不同。

回測發現,一旦恆指出現高開後,日內指數回落的話,係買入嘅最好時機。呢一個策略如果拎足10年數據,由2009年開始試起,夏普比率 (Sharpe ratio) 達1.2,雖然唔係太吸引,但已經完美跑贏恆生指數,而最搶眼嘅係,命中率高達76%。回測入面設定左執行上嘅做法為,如果發現高開後回落,喺期指收市前買入,持倉直到翌日同樣時間。如果恆指低開走高,策略同樣有效。最驚人係,策略最大回撤(Maximum drawdown)只有2.6%。

睇開呢個專欄嘅朋友可能會即刻問,有無過度優化(Over-optimization)㗎,我答你無。不過要注意嘅係,並唔係一高開少少再回落少少就觸發訊號,而係需要達到某一個距離。參數方面,容許我係度賣個關子。做開回測嘅朋友,你識做啦!

177 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!