搜尋
  • Admin

一個永遠有效的策略(一)(蔡嘉民)


喺投資投機嘅路上,相信好多人都想搵一啲必勝嘅策略,或者可以長賺長有唔會失效嘅方法。因為實在有太多坊間策略,一運行就已經唔賺錢,稍為好運啲嘅,就可以贏一排先至開始出現回撤,繼而慢慢失效。其中一個原因係,你所執行緊、賺緊嘅,背後無原因,例如一啲金融或者經濟上嘅理論去支撐,就算策略短期賺錢,都唔代表會長期盈利。即使你做左回測,如果個策略參數只係隨機設定,一個效果優良嘅回測都只不過係數字過度堆砌嘅結果,俗稱數據窺探或數據操弄(Data snooping)。相反如果你嘅策略背後係有理論加持,即使你遇倒回撤,你都會堅信策略會幫你賺返。

今次專欄要介紹一樣野叫做風險溢價(Risk premium),喺現實世界其實無處不在。舉例,保險公司賣保險,佢賺嘅就係風險溢價,因為佢承受住要賠償意外嘅風險而去賺你俾嘅保費。再舉個例,美國國債利率現時大約3%左右,而公司債企業債通常係4-5厘以上,例如Tesla 嘅Bond,依家做緊7厘。咁公司債咁高息,點解仲會有人揀國債呢?投資者通常都會假設大國嘅政府一定還倒錢,因為公司係會有倒閉風險,所以如果願意去承受呢個風險而去借錢俾公司的話,你就可以賺得更多,正正就係所謂嘅風險溢價。

喺期權世界入面風險溢價係一個非常重要嘅槪念,甚至係一個指標透露出做長倉(Long)定係短倉(Short)較為有利。計算方法係,將某日子長度嘅引伸波幅(Implied volatility),減去某日子長度嘅歷史波幅(Historical/Realized volatility),例如常用嘅會將30日引伸波幅減30日歷史波幅。現時恆指等價權IV係15左右,而30日歷史波幅大約17,即係風險溢價錄得-2。引伸波幅愈高,而歷史波幅偏低的話,意指期權非常昂貴,可以解讀為市場過分憂慮,做期權短倉就會有利,反之亦然。下次再續

103 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!