搜尋
  • Admin

一個永遠有效的策略(二)(蔡嘉民)




上期同大家介紹左一種溢價,叫做風險溢價(Risk premium),喺日常生活之中經常出現。溢價一聽,表面上係一件唔好嘅事,例如購物,無人想俾一個貴啲嘅價,買件唔值咁貴嘅貨。喺金融市場入面,例如窩輪同牛熊證,發行商(Issuer)賺嘅就係呢份溢價,同樣價值同埋條款嘅期權,係會平過你喺各大行手上買倒嘅窩輪。咁點解仲有市場呢?仲要香港嘅衍生權證市場係全球第一。原因係,玩窩輪牛熊並唔需要你將啲錢轉去另一個帳戶度,可以一個帳戶買哂股票同權證,所以突左出黎你要俾嘅溢價,就係用黎買方便。

相信大家應該對溢價呢樣野有一定嘅了解喇。上次提到恆指喺6月中有一個負嘅風險溢價,所以期權長倉抵做。如果做左長倉嘅,應該可以舔盡最近市況波動帶來嘅gamma同vega。負風險溢價係咪好常見呢?一啲都唔常見。有無唸起啲人成日講,做Long輸嘅機會大,做Short贏面大呢?其實正正就係因為市場長期都出現正嘅風險溢價,所以做期權長倉就要俾出一個貴過理論值嘅期權金。正風險溢價係一個常態黎,就好似波幅率微笑(Volatility Smiling)咁,意指價外期權普遍係貴過等價期權,係一個正常現象黎。

風險溢價係引伸波幅(IV)減歷史波幅(HV),長期正數係因為市場一直都覺得未來蘊含住好多未知因素,而形成風險,所以無論期權炒家定係莊家(Market maker)都好,都一致認同平均嘅引伸波幅要比歷史波幅大先至合理。而且好多人願意俾出呢一筆貴左嘅期權金去保護自己嘅倉位或者投機。

溢價難聽啲就係要俾貴啲,咁但呢個溢價係咪一定係壞事呢?梗係唔係啦,如果你喜愛做期權短倉,咁呢個溢價就係你嘅好朋友喇。只要你願意承受爆邊,或者突如其來市場波幅變大嘅風險,你就可以每個月咁樣袋呢一個風險溢價,或者就係我地平時所講嘅時間值了。下回續。

93 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!