上一篇專欄提及到分散投資嘅概念，打散哂黎買未必真係一個好有用嘅方法，去減低成個帳戶嘅風險。舉個例，就算你打散哂咁買唔同板塊嘅股票，一個浪打埋黎，你都係避無可避。你可能會話，咁大牛市咪無事囉。大牛市你打散買都無好處，一個大升市通常係靠輪流炒去推高，你會後悔點解無All in龍頭板塊。
今次講下對沖(Hedging)。對沖簡單嘅定義係加入一啲高相關性嘅東西以降低現時帳戶嘅風險，而我會睇成為降低Beta或者Delta都係屬於對沖。最簡單嘅日常例子係，你買隻A股，你只知道隻股會升，你唔想估人仔會點郁，你亦都唔知人仔會點Chok法。呢個時候，你怕人仔跌會令你喺隻股身上賺嘅錢都無埋。解決方法就係用港紙沽人仔，或者叫做沽CNH/HKD。即使人仔跌，都唔會令你有損失，你就可以安心剩係處理隻股票了。
但慢慢地，身邊好多朋友都誤會左對沖嘅用法，最有趣係見過人買1張大期，沽3張細期去對沖。如果從對沖行為之中，只係純粹用Correlation係1啲產品去降低倉位，並唔應該稱為對沖，而係減倉。如果你唔係完全對沖的話，你某程度上其實係做緊Pair Trade(配對交易)。
例如你搏緊騰訊業績做好，你揸緊騰訊，但又怕美國個市有政策會令個市跌，你沽幾張恆指期貨，呢個行為係屬於聰明對沖。因為稍為做一下數據分析，你會發現騰訊相比大市有Alpha。而如果你係揸緊港交所，搏大市氣氛熾熱，成交急增，但又怕外圍因素影響而沽期指，呢個行為其實係浪費彈藥，未必真係有效做到對沖。因為港交所過去3年有一個Negative Alpha。市升佢只會升得多，但市跌亦都跌得多過恆指，所以揸住388，沽恆指，市跌大多數都係輸錢。
所以對沖，絕對唔係買A沽B咁簡單，即使你一手揸股，一手揸Bond，究竟係咪有效對沖/做到分散投資?一定要計過數先知。下期續。