搜尋
  • Admin

你究竟係咪真係做緊對沖 II(蔡嘉民)



上兩期好簡單咁提及到分散投資同埋對沖,究竟分散投資係咪指打散哂咁買就安全呢?究竟對沖係咪差唔多嘅產品,一手買升,一手買跌就係做緊有效對沖呢?

係入正題前,要講下除左上集提到嘅聰明對沖嘅例子,其實有啲對沖嘅做法,唔同人做,成個意義都唔同。有時見倒有啲朋友,例如買左20萬匯豐,然後覺得個市唔安全,心郁郁想做對沖,買幾張Long Put做下保護。但問真啲,佢其實並無check到引伸波幅(Implied volatility)高唔高,或者對後市無咩特別睇法。呢種做法嘅對沖,倒不如直接放左手上嘅正股佢。因為計計埋埋啲期權買賣差價(Bid ask spread),以及手續費,有可能得不償失。

相反,大型基金嘅操盤手就會經常用呢類方法對沖,一來因爲佢地額大,對流通性(Liquidity)有要求,而市場深度(Market depth)不足,唔可能係短短幾分鐘/一小時內放哂手上嘅股票,甚至如果反手後要再度入市,需要一定嘅時間;二來佢地有規定最少嘅正股持倉量。當然如果你係計過數,相信引伸波幅有機會爆升,買Long put搏賺Vega,順手保護正股係唔錯選擇。

除左上述呢個,用同一Underlying唔同工具嘅對沖例子之外,亦有同一工具但不同標的(Underlying)嘅玩法。例如你手頭上有好多恆指期貨,突然你發現個市好似想跌咁,正常黎講,可以選擇直接放左啲期貨佢,你亦都可以選擇搵一啲相關性高嘅產品做反向,例如國企指數。佢地過去1年嘅相關性有高達92.5%,絕對可以幫倒手。咁恆指同國指有咩大分別呢?可以留意下高權重嘅成分股,例如3大內銀係國企有超過30%權重,而佢地喺恆指就只有15%左右。如果你唔睇好個市之餘,特別唔睇好內銀,咁沽返幾張國指就係一個唔錯嘅Hedging idea喇。

不過記得,對沖一定要搵啲相關性高嘅產品,唔係嘅話,就有機會雙失架喇。下期會講多啲分散投資同對沖嘅分別!

40 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!