關於恆指幾時見頂，上星期嗰篇就講左由於國企指數係牛三往往都會跑贏恆生指數一大節，起碼令到個恆指國指比率跌10個百分比先。雖然從統計學角度黎睇，樣本數量(Sample size)唔多，但樣本數唔多，最多唔值得我地all-in去做，至少可以做個參考。不過喺度容許我為恆指國指其他嘅微妙關係賣個小關子先，今次想講嘅係有咩部署可以做。因為有唔少朋友睇完上一篇都問除左可以揸多啲國指期貨之外，仲有咩動作可以用黎迎接大時代。
如果唔玩期貨嘅朋友，一來可以買入內銀，特別係工行同埋建行，呢2隻最受北水關注，一來因爲市場深度最夠，二來因為市盈率好抵買。由於國指基本上就係2內險、4內銀做大代表。相對內險，今年內銀更受北水青睞。
但如果想慳啲銀彈的話，當然期貨係最好選擇，因為資金運用率最高。所以直接揸張國限，用大約4萬保證金就好似買左67萬股票咁。如果覺得期指槓桿太大，唔想直接賭方向的話，可以考慮做配對交易(Pair trade)。由於我地睇好國期多過恆指，可以直接揸2張國指，然後另一手沽1張恆指期貨。咁變相就會係搏緊佢地之間嘅相對關係多過直接買國指升。
咁點解要提高資金運用率呢，因為喺牛三呢嘅時段，望望引伸波幅(Implied Volatiltiy/IV)就可以知道會係勁chok嘅階段，一個唔覺意，好快耗盡彈藥。喺牛市大部分時間，引伸波幅都只會慢慢向下，皆因市場莊家計算引伸波幅嘅公式設計所致。但有某啲特別嘅時候，就算市升，IV都會升，例如15年4月，同埋上個月。呢啲時候，通常如果市跌，窩就會縮，就好似上星期我地見倒恆生波幅指數(VHSI)咁。
可惜，今日一開市低開幅度太大，令到呢個效果無預期出現。啟示有二，如果信佢的話，嗰市嗰波幅唔會再似去年咁靜；而如果覺得市場反應過度的，VHSI應該有啲偏高，我地就可以做一啲期權策略去應對，例如賣出勒束式組合(Short strangle)。
下回續。