搜尋
  • Admin

啱戰場同兵器 輸錢都變月月開紅酒(蔡嘉民)


上期專欄提過究竟點樣去決定做交易做得幾密好,最後一個未提及嘅決定因素就係交易成本。咁啱上星期五有消息傳港交所考慮要求政府減低股票印花稅,撞正今期要講嘅主題。工欲善其事,必先利其。係深入講交易成本點樣影響交易策略嘅制定之前,先講應該選擇咩戰場同工具。揀啱戰場同兵器,絕對可以令你由輸錢變個個月開紅酒。

要知道每次買賣股票,最傷最傷嘅其實係政府嘅印花稅(Stamp duty),每次盛惠0.1%,行內稱0.01%為1滴,所以印花稅每次交易為10滴。每買賣一手騰訊要$35000,就要俾政府70蚊。身邊都多朋友係銀行炒野,加埋銀行佣金收你0.25%,一個來回,無左0.5%+0.2%=0.7%。夠未?未夠,唔可能每次買入賣出都係咁好彩一排隊就有人黎同你成交,你要即時買入就要越過買賣差價(Bid ask spread),去同對家成交,行內稱Cross the market。騰訊嘅買賣差價係屬於好窄果類,因為個價夠大。佢0.2係一跳,0.2/350=0.06%左右。一買一賣,0.5%+0.2%+0.12%=0.82%,呢0.82%就係印花稅+佣金+買賣差價。

0.82%究竟係幾多?假設你嘅年回報追得上一個表現偏唔錯嘅基金經理,年回報20%,月回報賺1.5%一個月,其實已經勁過MPF。但你只要每個月買賣2次騰訊,留意,係淨係2次!已經可以將你由全年唔錯,而且值得開紅酒嘅表現,變為每個月1.5%-0.82%*2=-0.14%。你無睇錯,係蝕0.14%,全年錄得虧損。而且每次買賣,感覺上都已經輸在起跑線,一定要賺返0.82%先可以到達打和點(Break even point)。心理壓力已經好大,如果不幸跌一跌,甚至會想止蝕。係咪完全無唸過交易成本咁大影響呢?

好喇,計左咁多數,聽落好似好灰。咁點樣可以控制成本?買股票政府印花稅基本上就無可避免,除非你轉戰中國內地市場,佢地只收賣方0.1%,又底者去日本澳洲炒,唔收印花稅。係香港,由2015年年頭起,買賣ETF(交易所買賣基金)都豁免收印花稅,所以唔少程式交易都去左做指數ETF間嘅套戥(Arbitrage),ETF唯一比較差嘅就係較大嘅買賣差價。當然最好梗係炒期指,因為無印花稅,而且沽空無借貨利息,加上買賣差價只有2/28700=0.007%,係0.7滴。所以解釋左點解程式交易嘅世界,期指係最好嘅戰鬥兵器。

當然如果港交所真係如傳聞所講,減一半印花稅,我相信將會有唔少新策略可以係股票世界賺錢,大家好好準備。下期繼續深入探討點樣幫大家慳錢,包括參數嘅控制,同埋點為之過度交易(Overtrade)。

#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。

94 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!