搜尋
  • Admin

大戶係邊個?教你認清戰場上嘅敵人(蔡嘉民)




前幾期專欄分別教大家點為之一個好嘅策略,除左唔好盲中中咁睇個回報之外,仲要睇最大回撤(Maximum draw down)同埋交易數量先有意思。之後教大家計交易洗費同埋揀適當嘅戰場同工具,其實細心一睇,發現買賣騰訊都唔係一個合格嘅策略。假設你坐時光機返去一年前同啲大戶提議買騰訊,佢地係唔會有興趣。

原因一,假設上年10月頭買入,hold一年,年回報60.0%,中途最大回撤17.7%,年回報除最大回撤只有3.4倍。套利(Arbitrage)策略閒閒地都5倍以上,高到90倍都有。原因二,修復時間(Time to recover)有成5個半月,係咪唔講唔知,長揸騰訊會有接近半年唔賺錢呢?當中涉及一樣野叫「圖唔可以由右向左睇,要左向右睇先得」,遲啲有機會講。尚且唔好話全職炒股半年無飯開,老婆會走佬,俾著大戶一季唔賺錢都炒人啦。而且作為長揸股票嘅策略,咁股災點算好?你會覺得長揸好,只因依家係牛市。

之前計左咁多數,幫大家格哂價,精打細算之後,係時候認識一下戰場上嘅敵人,所謂知己知彼,百戰百勝。

大戶最簡單嘅定義,就係泛指係炒賣市場上多錢嘅人。散戶經常會覺得大戶就係將個市舞高弄低,望住散戶黎食嘅大孖沙。無錯,係細價股嘅世界,莊家充斥,將乾股推上推落易如反掌。但係喺大市之中,大戶又係何方神聖?

最多錢嘅,莫過於對沖基金(Hedge fund)、共同基金(Mutual fund)、市場莊家(Market maker)、資管公司(Asset management firm)等等。當年97年打香港嘅索羅斯你估真係一個人造市?佢都係聯同其他套利基金一齊打立體戰。佢地真正嘅叫法應該係機構投資者(Institutional investor)先啱。究竟呢啲「大戶」做緊啲咩唸緊啲咩呢?點解個個人炒股都會有一個感覺係大戶望住佢黎食,一做淡倉,下一秒就俾人挾到飛天?之後幾期慢慢同大家拆解行內秘密。

#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。

105 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!