搜尋
  • Admin

大戶係邊個?點唔小心賺咗你嘅錢?(蔡嘉民)


上一期專欄講到,究竟散戶口中嘅大戶係邊個。每一個交易日,上網去睇啲即市討論區,一定會見倒每個人留言都大戶前大戶後,咩引淡、假動作、引牛等等。每個人心中都有一個惡名昭彰嘅大戶望住佢黎做反向。點解會有呢種感覺呢?

重申多次,細價股的確唔排除,因為交投疏落,而且又有經紀牌(Broker ID)可以睇。但喺發達地方嘅期貨市場深度(Market depth)有返咁上下,又無經紀牌可以望倒,基本上除非你用嘅券商有黑池(Darkpool),否則無咩可能會知你做左咩盤。之不過黑池所做嘅野只會令你落單慢左,成交價差左,逼你要追多幾格先入倒貨,詳細遲啲有機會再講。

佢地並唔會主動同你對抗,見你做淡幾張就挾爆你。除非你都係大戶,而且做嘅市場係股票,因為股票沽空(Shortselling)涉及借貨,涉及利息成本。對家見到沽空大的話,有可能會借機買上。因爲沽空成本高,為左避免帳面損失擴大,做淡者係會傾向提早平倉去止血。就好似沽空機構俾人狂挾咁。

咁散戶點解會有呢種感覺呢?原因有二,第一因爲你已經墮入行為金融學(Behavioural finance)嘅陷阱,第二因爲期貨係零和遊戲(Zero-sum game)。

舉個日常生活例子,如果你猜包剪揼嘅時候唔專登去思考,而係順其自然咁出手,你以為唔會有特定嘅模式。可惜,愈係下意識咁出手,會愈有既定模式,愈大機會輸;金融市場亦然,如果個市窄幅橫行,突然單邊突破,去到特定嘅斜率,其實大部分主觀交易(Discretionary trading)嘅散戶都會係果瞬間,同時覺得會繼續跌而同時㩒制。相信大家都會認同:用同一觸覺去做交易嘅同步率係會極高,呢個觸角就係人類嘅主觀交易觸角。

第二原因,其實超過9成買方交易公司(Buy-side trading firm),係出手之前都一定會做足回測去確定策略可行。其實佢地只係匿埋不斷試有咩方法,或者幾時出手可以賺錢。根據零和遊戲,咁佢地策略賺嘅錢係邊度黎?答案就係無做回測嘅主觀交易者,佢地嘅出手模式,正正俾大戶嘅程式回測完全捕捉。

所以並非大戶望住散戶黎食,而係人眼去做Trade嘅時候會令集體行為一致性,零和遊戲下,繼而導致大戶嘅程式唔小心賺左你輸嘅錢。下期再續。

#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。

156 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!