搜尋
  • Admin

常見的財演分析謬誤(蔡嘉民)



成日見啲人問啲教班嘅導師,炒得叻點解仲要出嚟教班,擺明賺唔倒錢先喺度呃學費幫補生計啦。所以好多人就認定出嚟做教學嘅都係神棍。其實讀大學嗰陣,幫最多中學生補習嘅,偏偏就係大學入面最搵錢嘅科目嘅嗰班學生。好多醫學生讀緊大學,甚至畢左業都仲幫緊人補習,唔通佢地搵唔倒食?佢地走出嚟係因為公開試成績好,所以市面上有需求。不過唔排除有誤人子弟嘅導師,所以喺度分享多啲小技巧,一齊訓練下批判思維。

喺香港搞大眾投資教育嘅其中一個原因,係因為曾經喺機構入面做過,發現大眾同機構嘅水平有段距離,加上坊間實在有唔少分析謬誤睇唔過眼。不過例子實在太多,喺度隨意舉幾個例子。例如上星期喺電視見倒有分析列舉出過去十幾年嚟發生過嘅死亡交叉,跟住搵出信號出現之後,大市最低跌幾多。而且,個分析入面,仲要分咁多次死亡交叉為「成功」同埋「失效」死亡交叉。個分類方法為,如果若干日內,個交叉穿返上去的話,就唔計。

分析結果顯示,失敗死亡交叉之中,大市調整唔多;成功死亡交叉中,最深調整可以有幾十個百分比。

喺呢度出現咗兩個大問題:一,用大市最低跌到幾多根本無意義,因為你永遠唔會知依家係咪最低,所以Lowest係一個Untradable (無法交易) 嘅數值;二,一日個死亡交叉未穿返上去,你一日都唔知佢會唔會上返去,即係個分析結果只會喺你有時光機嘅情況下先有用。

所以按呢個分類方法,結果一定係成功死亡交叉傷亡慘重,失敗死亡交叉後市回穩。因為你望完 結果先返返去做決定,做分類。係一個不折不扣嘅Look forward bias嘅完美示範。

真正做法係點?下期續。

408 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!