搜尋
  • Admin

常見的財演分析謬誤2(蔡嘉民)



上次講到,好多坊間嘅分析方法都有謬誤存在,例如好多人會犯咗Look forward bias,用個結果去幫信號分類,再去睇信號嘅啟示。例如將死亡交叉分為成功同失敗死亡交叉,然後再睇結果係一個錯誤示範。真正做法係,一旦信號出現,就要將佢納入計算,只要死亡交叉出現,就開始計算後市表現如何,並且將所有結果,唔理好壞,都要一齊去睇,去評估。

教學嗰陣,有時發現有啲人會將失敗嘅結果拎走,將賺錢嘅野合體,然後欣賞自己美好嘅成果。舉個例,例如有啲人會想睇下長揸咩公用股會有最好嘅回報,假設可能先拎5隻公用股幾年嘅歷史數據做測試。測試後,可能發現A、C、E股票嘅結果比較好,而B、D股票就差啲。好多人會將B同D delete咗佢,可能因為眼冤,睇佢地唔順眼。然後望住表現比較好嘅ACE組成嘅回報圖,覺得自己搵咗個驚世策略。

但當中問題係,佢地無唸過ACE有咩特別,而只係純粹睇完測試結果去選擇。箇中錯誤在於,呢個做法背後其實當咗自己喺幾年前已經揀得出ACE呢幾隻股票,先至成立,先至有效。呢個動作其實犯咗嚴重嘅倖存者偏差,英文係Survivorship bias,即係故意避開失敗嘅例子,再加上當咗自己可以預知未來咁去揀股。因此,呢個例子同時出現兩個Bias。

除非,分析者搵得出ACE股同BD股有咩唔同,從而可以一早喺幾年前已經好肯定咁踢走BD,否則絕對唔可以睇完測試結果,先再決定納入邊一啲股票或者策略入去組合。

唔單止係回溯測試先會出現Survivorship bias或者Selection bias,喺好多地方都會見倒呢個效果出現。大家知唔知點解美國標普500指數咁多年黎表現會咁好?下回分解。

291 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!