上次提到恆指同國企每逢牛三，都會出現微妙關係。當中所指嘅其中一個微妙關係，正是國指必定跑贏恆指。你可能會有一個感覺係，升市嗰陣，一向都係國指升得多過恆指㗎啦，好平常啫。可惜，呢一樣野好多時中左我地嘅盲點。
其實今次呢一個牛市大升浪，係自2016年2月開始，係嗰一日，恆指水平除去國指水平係2.44左右。自嗰一日起，國指基本上無點跑贏過恆指，個比率由2.44開始上下波動，一直橫行。去到2017年3月，個恆指國指比由2.33一直升，升到2017年年尾嘅2.56。個比率升即係國指不斷跑輸。
我地慣常會有國指一向跑贏恆指嘅唸法，係因為國指貝塔值(Beta)較大。可惜其實升得多，同樣跌得多。但係今舖就唔同，個比率由12月尾急跌到執筆時嘅2.44。
國指突然瘋狂跑贏，原因係北水大量湧入，導致內銀狂升，其次因爲人仔升值美元大跌，H股計落愈計愈平。但分析原因個個都識㗎啦，事後孔明咁款，重點係，仲有無得升先？
如果睇個恆指國指比，應該仲有唔少空間。做開量化分析望下歷史數據就基本㗎啦。2007年8月到10月尾，比率由1.86急跌到1.49，跌幅超過20%。2015年4月，比率由2.045急插落1.87，跌幅有8.6%。望返今次，從絕對值睇，個比率今次明顯最高，意思係對比以往，恆指真係好貴，多得騰訊唔少。再黎，用百分比去比較，今次由2.56起步，保守向下望10%，都起碼2.3先止步。而且國指PE宜家仲要得10.6，大媽見倒都嗌抵啦。
用百分比未必係一個最準確嘅方法，只係粗略估計，下一次會用另外兩個方法，繼續揭示恆指國企比率嘅微妙關係，從而計俾大家睇大市幾時見頂！
Kommentit