搜尋
  • Admin

恒指幾時見頂之一(蔡嘉民)

更新日期:2018年8月6日


做程式交易或者系統化交易果陣,成日都會有學生問,究竟入市同離場信號會跟據啲咩,會唔會加個止蝕啊?如果對個信號或者指標非常有信心的話,我鍾意愈少參數愈好,而且無理由望住指標A入市,跟住花心地望住指標B離場。

話雖如此,近幾個月大家都望住互聯互通嘅資金流動出入市,但亦都有人會擔心出現成也北水,敗也北水嘅情況。執筆之時,北水流入已經佔南向合計額度超過70%,跟據呢個速度,差唔多唔洗幾個月就會見頂,到時候絕對有機會成為財經新聞嘅頭版。究竟成交額頂到盡係咪一件好事呢?

第一秒下意識咁唸,當然係好事啦,北水流入到盡一盡喎,如果港交所會放寬額度限制梗係唔同講法啦。但如果限額短期內無增加到,係咪意味住北水佔大市成交額會下降?

大市成交額日日向上,十足當年牛三嘅境況,但相信成交額嘅增加並非完全來自北水。成交額由1個月前嘅700億升到近排嘅1700億,但南下資金只有增加幾十億。可見,一來係北水帶動大市嘅熾熱氣氛,令其他本地同國際炒家係港股每日炒多兩轉,二來唔排除北水有其他通道流入。咁樣一唸,當額度用盡之後,預計股民嘅爆炒氣氛一定會狂熱一輪,大市成交會相應增加,但係主力買上支撐大市嘅北水有機會止步。唸真啲,未必係一件好事。黎緊,大家可以望實額度餘額作下參考。

另外,除左可以望住北水嘅流動之外,其實有另一指標某程度上係可以透露港股見頂嘅信號。唔知大家有無留意恒指同國指之間相對嘅強弱表現。雖然國指係擁有較高嘅貝塔值 (Beta) — 高Beta意思係大市升的話,國指正常係會升得比恒指多,下跌亦然,但大家有無發現每逢牛三,國指同恒指之間嘅微妙關係呢?下回分解。


#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。

68 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!