搜尋
  • Admin

抽新股係豬頭骨 買恒指好過買騰訊(蔡嘉民)


近排抽新股熱潮都幾狂熱,身邊有極多本身無炒過、無炒開股票嘅朋友都突然搵我,問我抽唔抽閱文(00772.HK)、雷蛇(01337.HK)、易鑫(02858.HK)好。我嘅回應一律都係:「我唔抽喇,你有閒錢就抽啦,無壞。」因為抽新股係一個豬頭骨,係一個好矛盾嘅遊戲。如果隻股好好,好出名,好多人去抽的話,最後中簽率一定偏低。好似閱文咁,孖一球先secure倒一手。一手開波最多賺一皮,唔多肉食。如果一隻你可以抽倒好多嘅新股,證明無人搶,最後都唔會點賺。當然唔排除有啲好乾嘅創仔,無咩人留意,幾個月就爆左十倍出黎。

相反,我關注嘅係市場嘅狂熱,有少少似2007年嘅感覺。好多唔炒嘅朋友開股票戶口,就算唔係抽新股都會想月供股票,或者問有咩方法可以賺錢。不過我相信呢個只係前奏,仲有好好玩嘅後市。當年係日日開市都gap up幾百點,即刻再升幾百點上去,日復一日。當出現呢個情況再唸都未遲。不過作為程式交易員,相信嘅應該係數據,而非感覺。

另一樣注目嘅係騰訊(00700.HK),升到398.6蚊,癲係好癲,又有朋友問買唔買好。我答「其實買恒指係好過騰訊。」呢句講出黎真係嚇一嚇,但的確係事實。因為舉個例,用10萬買騰訊,有啲券商係會做倒3倍孖展俾你,等於用10萬就買倒30萬嘅騰訊。相反,用10萬買1張期指,其實係等於買左1百45萬等值嘅恒指,29000點乘50蚊。除非你覺得騰訊嘅Beta值(啤打/貝塔系數)有4.8倍。即係恒指升290點,騰訊會升19蚊,或者恒指升1%,騰訊會升4.8%。基本上無可能,所以係資金運用嘅角度,我都係會繼續專注炒期。

呢個moment,可能會話10萬買一張大期好危險喎,咁有10萬都唔應該痾煙一隻股票啦,唔好唔記得騰訊最大回撤曾經有20%,10萬去做3倍孖展係可以蝕6萬。騰訊的而且確係好股,但作為精明投資者,一定要計計數。遲啲再繼續分享更多坊間投資嘅思考盲點同謬誤。

#財演算法 #蔡嘉民

者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。

縱橫市場逾10年,玩遍全球資產,邁向財務自由。

63 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!