前3篇講及北水南下做分析可以賺唔少錢，作為一個炒家，當搵倒一個持續獲利嘅交易策略之後，係咪就撓埋雙手食花生，等數銀紙呢？人有惰性好正常，但我嘅貪念更勝一籌。完成一個策略後，下一步會唸有咩方法可以將策略放大。北水成日有人講，但坊間似乎唔多提及過南水向北走。
之前分析指北水大多數係中國內地嘅機構投資者，南水係大戶所為一啲都唔例外。但北水係單一國家嘅大戶，南水係國際大戶，小弟先前嘅唸法係，內地大戶睇香港市場有一定命中率，即使某部分升幅係由購買力量推出黎，但都有參考價值。而逆向推斷，國際大戶睇大陸市從而買入賣出，表現想必都唔會差太遠。
分析結果顯示，由滬港通推出後，至今3年黎策略嘅夏普比率(Sharpe Ratio)可以去到2.4，而跟北水炒港股嘅策略過去3年大約1.9。發現一點係，跟北水策略近年半賺得特別順暢，如果集中睇過去年半嘅夏普比率，可以高達2.4，咁外資大戶睇大陸市就同中資大戶睇香港市不相伯仲。
如果要公平咁用同一個時期去比較，咁數據就話俾我地知跟外資大戶買大陸市，比起跟隨大媽買港股回報充其量穩定少少，但總體差唔倒幾多。其實夏普比率超過2已經係一個好唔錯嘅策略，因為無論好多被動定主動型嘅投資基金，多年黎平均夏普比率都唔過1。
咁下一步你就會問，我地點買大陸市呢？其實有幾個途徑可以做，最方便係直接買A股ETF，最出名嘅有例如2822、2823。有一點要提及嘅係，小弟係計算上述嘅夏普比率時，係直接拎內地上海嘅A股期貨黎做，相對ETF，買賣差價會細啲，不過香港買ETF係幾年前起已經免印花稅，對於炒家黎講真係福音。