就到年尾，如果要做一個關於恆指今年嘅小總結，相信大主題都係離唔開北水。今年，一眾股民除左可以長揸幾隻重磅股，幫自己賺下外快之外，北水流入愈黎愈急，我地仲可以細心運用北水流入呢一個數據，做一做Backtesting。你會發現當中嘅流入啟示係可以幫你賺突聖誕大餐同埋聖誕禮物。但係作為量化交易員，唔可以單純見一個策略賺錢，就盲中中去用。一個策略Backtest點賺錢都好，你一家要解釋倒，唔係嘅話，會好快唔Work，因為「Correlation does not imply causation」(相關不蘊含因果論)。所以今次會展開探討北水其實目的係咩。
可能嘅原因有三，一，部署後市。有可能因為內地投資者覺得香港後市潛力大而買。因為極大部分有係AH兩地掛牌嘅公司都係港股通嘅成員，H股對於A股有折讓係不爭事實，當中H股平過A股20%以上嘅，多達83隻。如果根據呢一個假設，再加上大媽嘅眼光係準的話，只要北水一日無停過，個市一日都未玩完。望住北水就係最好嘅牛市指標。
可能原因二，推升港股。如果你將北水資金流入股票嘅數字，同當日果堆被流入嘅股票表現拍埋一齊睇，你會見到相關性極高。你可能會話，買入得多梗係升啦。但如果你認同北水愛股大升係因為北水自己狂推的話，有機會已經推翻上面第一個原因。因為一旦佢地嘅天量資金係可以直接操控市場升跌，佢地無必要進行部署，唔洗花心機去估後市。如果呢一點成立的話，咁北水就唔可以作為判市指標了。因為你只有眼白白睇住個市跌，先發現佢地已經流出左港股。
字數有限，下期會繼續探討第三個原因以及揭示運用資金流動數據分析後嘅結果。
作者簡介：對沖基金程式交易操盤手，求學時期上堂做backtest多過聽書，畢業前更於全中國程式交易比賽中勝出，擊敗一眾來自清華、北大的Rocket Scientists。縱橫市場逾10年，玩遍全球資產，邁向財務自由。