搜尋
  • Admin

【財演算法】交易頻率低的好處(蔡嘉民)


交易頻率對於唔同炒家黎講,就好似武俠小說入面唔同派系咁,有啲人鍾意近戰,有啲人鍾意拎弓箭/長矛做遠距離嘅對戰,各施各法,各有所長。如果你問有無過邊一隻好啲,只可以答你,真係各有各好。

例如短炒好處係你會更容易達到一個較高嘅夏普比率(Sharpe ratio),因為短炒比起長揸更加容易避開啲調整、回撤,甚至乎熊市,所以帳戶回報一定會比長揸穩定。但相反,短炒一定會比起長揸較難搵倒長期賺錢嘅策略,因為頻密買賣的話,手續費同買賣滑價(Slippage)有機會超過利潤。例如高頻交易有好多機構投資者都已經做緊,競爭激烈,市面上因為出現錯價而可以套戥(Arbitrage)嘅機會愈黎愈少。

不過要注意嘅喺,長短嘅交易頻率都有佢地適用嘅工具,就好似唔可以用刀仔同弓箭鬥,亦唔可以喺狹窄環境下用弓箭同刀劍鬥,一定要揀啱兵器先至會得心應手。例如絕對唔應該用股票或者買賣差價寬嘅期權做即日鮮短炒,亦都唔應該長期持有一啲期限結構(Term structure)好明顯嘅期貨,因為長期升水嘅期貨會慢慢向下折讓,當佢係股票咁長揸只會無乜著數。

有一個極低交易頻率嘅策略喺恆指上面表現都唔錯,夏普比率遠高於長揸恆指。策略係傳統MACD做法,不過參數用7,45,15取代12,26,9,同埋用於週線圖。策略過去3年表現都唔差,避倒哂啲回撤。所以,大家如果唔係話一定要追求夏普比率1以上嘅策略的話,可以考慮降低少少交易頻率,搵倒賺錢策略嘅機會就可以大大提高。

p.s. 呢個星期係《港股策略王》周刊實體書最後一期出版,唸起之前次次經過便利店都會買返本,好似集郵咁,喺屋企儲下儲下就一大疊,依家黎到電子世代,睇黎集郵嘅感覺好難可以搵得返,有啲感慨。

112 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!