搜尋
  • Admin

【財演算法】圖表派的技術陷阱(蔡嘉民)




前幾篇專欄就數左唔少技術性嘅陷阱,包括一啲Backtest時會經常犯嘅錯誤,亦都有一啲思維上,心理上嘅常犯問題。今次會講多少少圖表上,睇圖嗰陣會出現嘅問題。

舉個例,可能唔少人會話,如果大市係咁跌,點樣知道幾時會見底呢?睇睇成交量就知!如果成交量突然變大,就係大市見底嘅時刻。喺度唔係想話佢錯,而理論上的確有佢嘅道理,因為好多時大市成交量突然大增,即係嗰個位係重要位置,睇好睇淡嘅人打哂交,睇法好唔同。因為如果睇法一致的話,大家都覺得會跌嗰陣,全世界都擺個賣盤出黎,無人睇相反,就唔會有大成交出現。

喺聽倒一個策略之後,你係咪就會心思思想出手呢?有睇開專欄嘅都知,一定要做個回測先,就算唔回測,最少都睇下幅圖,睇下係咪真有其事先好出手。

有好多人嘅做法係,佢地會望下每一次大市到底部嗰陣,有無出現大成交。聽落呢一個做法無咩問題。你心唸,唔係咁做咁應該點做?呢個係最直接最簡單嘅做法啦,仲有其他方法咩?

其實,如果咁做的話,已經犯左一個錯誤。真正做法係,係跌浪中間,由左向右睇,搵下有無出現大成交,如果出現左大成交,個市有無見底向上。因為個策略係,大成交就會見底,所以驅動嘅信號係大成交,所以要望嘅係,個市大成交有無彈。但作為一個人,肉眼去睇圖嗰陣,你會習慣左去望下每次市底係咪都有大成交,因為咁樣去搵易搵勁多。

但千祈唔好唔知,的確係可以每次市底都大成交,但呢個策略一執行就狂輸,因為如果不斷下跌中途係咁出現大成交的話,一早已經輸死左,你會一早就係咁買入博反彈。筆者身邊有唔少朋友重複犯錯,用左錯嘅方法去目測一啲圖表派嘅策略,可惜可惜,希望大家可以做一做呢個思考實驗!

471 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!