搜尋
  • Admin

點樣降低風險先啱?(蔡嘉民)


上期專欄最後問左一條問題: 如果揸緊大市嘅ETF,突然想降低風險,應該要點做。答案係,如果你倉位唔係非常大的話,直接減倉係最佳選擇,但揸ETF同揸股票唔同。之前有文章提過,買賣股票最大嘅成本就係印花稅(Stamp duty)同埋買賣差價(Bid ask spread),ETF最吸引人嘅地方正正係佢免印花稅,所以如果你手揸嘅係一大堆股票的話,我寧願你揀第二個選擇 — 沽出一啲相關性高嘅產品,例如恆指期貨,或者國指期貨。因為急起上黎直接用市價盤(Market order) 成交,包你一瞬間就保護左成個倉位,當然數要計得啱!

而第三個選擇 — 放少少,然後去揸其他野,呢一個做法似係中長線資產管理嘅做法,因為中長線投資係要因應經濟循環經濟周期,去決定持有股票同債券嘅比例,從而搵出最好嘅組合,例如5:5,或者6:4。最好嘅組合嘅定義,當然係高回報而同時低風險,可以從夏普比率(Sharpe ratio)計算出黎。

如果你因為個市有調整/整固嘅跡象,而由股票轉一啲去日元/黃金去避險的話,有可能會被左一巴右一巴,原因有2個。第一,牛市中段嘅調整未必有高連續性/Auto-correlation(自相關性),一支陰燭之後,個市可以當無事發生過咁樣繼續升。其二,你要了解自己係想做對沖定還是分散。你突然做一個交換嘅動作係因為,你相信手上資產下跌時,另一資產會幫倒手,咁呢個時候,你搵嘅就要係高相關性嘅產品,而非日元/黃金/債券。否則,分散投資應該由建構組合第一日就要實行,而非調整來臨時先至打散。

當然,如果你有充分理由相信,調整會持續好一段時間,基於宏觀/經濟原因的話,交換其他資產的確為一個不錯選擇。皆因平衡組合(Rebalancing portfolio) 嘅時候,買賣成本非常昂貴,所以賣出後再轉入其他資產嘅行為,並唔可以頻繁進行。

55 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!