上期提及左兩個宏觀指標去睇下大市幾時會股災，一個係信用違約掉期，另一個係信用利差，有讀者就話出面比較少講呢類嘅指標。其實正正就係愈少人知道，就愈有效。
有一個日常生活嘅例子可以類比，就係買六合彩。其實喺佢派1億獎金嗰陣係最唔應該參與嘅時候。相反，派800萬嘅時候，完全無廣告，姨媽姑姐都無提及，呢個時候值搏率係最高。因為股市某程度上係一個零和遊戲，同六合彩一樣，愈多Crowded trades、愈狂熱就愈無著數。
就好似大賣空(The Big Short)呢套戲入面，07年只有極少人覺得個市會跌，個個銀行家都恥笑主角。睇指標都係，如果睇啲個個人都睇嘅指標，就只會慢人一步覺醒個市場已經步入熊市。充其量你都係做到同步，並無可能快過其他人轉身。
今次要介紹另外2個指標，一個係Initial Unemployment Claims(申請失業救濟金人數)，我睇嘅係4週平均版本，因為移動平均線係量化分析師一個最簡單去噪(De-noise)嘅方法。喺2000年12月，指標錄得348，當時SPX 1320點。無幾耐，就直插1000點樓下。復甦及後，指標自03年後無上過350以上，直到07年12月，指標抽升至349。SPX報1468點，事後無耐，又插落1000點下。而依家，指標為223，係1969年來最低點。同之前提及嘅指標用法一樣，有一個警戒水平。呢個警戒線為350，不過13年後完全無接近過。
另一個就比較多人留意，不過佢的確有箇中嘅有效性，就係Yield Curve(利率曲線)。呢度指嘅係美國國債，將10年期息率減去2年期。正常黎講有通漲，遠要高過近。坊間有好多講法係，如果曲線變平，即係遠近期息差為0，就係股災。可惜呢個信號會變左過早出手。例如1997年尾，當時如果沽空美國大市，會1000被挾到上1500。而2005年尾，曲線再次變平，嗰陣出手，就會挾足2年。所以真正做法係見負後，等佢挾上50個基點先出手。
有機會再同大家分享更多指標！