搜尋
  • Admin

點解有啲財演特別容易受人注目?(蔡嘉民)



上期講到就算有人走黎向你兜售一條勝率7、8成,值搏率2倍以上嘅策略,如果當中係靠使用極端參數的話,係毫無意義。剩低有一個未講嘅原因,係因為修復時間(Time to recover)太長。修復時間嘅定義係,策略運行中,由你開始輸錢嘅一刻計起,直至你贏到返家鄉嘅時間。

舉個例,我長揸騰訊(00700.HK),由2016年揸起。喺16年10月中,騰訊由220蚊左右一路跌到180蚊,直到今年3月中上返去220蚊。中間經歷左5個月嘅時間,正正就係修復時間。

炒過野嘅人都知,中間完全唔好捱。呢一隻係騰訊,你梗係話夠擔長揸架。俾著係有人賣俾你嘅策略或者係一隻細價股,有足足5個月唔賺錢,你一定嗌佢回水,或者需要有超強意志先至唔會放手。

交易頻率(Trading frequency)太低,容易遇上長嘅修復時間。所以用一條一年先得幾條trade嘅策略,不幸輸錢,一等就係半年。喺度分享一個個人經驗,有一種策略係捕捉商品嘅季節性周期(Seasonality)。之前發現每年春夏交接之時,取暖油(Heating Oil)都會上升。回溯測試發現過去10年中9年都賺錢,平均賺30%以上!有理無理即刻追入,可惜今年一進場就開始跌,到最後止蝕埋。

故事教訓:樣本數據太少,即使90%命中都係會輸。而且想要報仇的話,修復時間足足1年!所以策略要有一定交易頻率先有意義。

講左咁耐,同個標題有咩關係?關鍵在於交易頻率。財演講股如果係偏向短線,每日都會講下聽日大市點行,相對係容易受到注目,因為命中與否隔日就會揭盅,會引起更多輿論。相反有人會評論長期走勢,講下未來一年最有機會賺錢嘅係買咩股票,佢地被炮轟嘅機率會較低。因為答案一年後先揭曉,到時人人都會唔記得講過啲咩。

程式交易員追求嘅正正係較高嘅交易頻率,可惜注目與否並唔重要,因為回溯測試(Backtest)已經完全反映策略嘅實力。最後分享多樣野,對沖基金內部策略追求嘅修復時間,係一個月以內。想知點做到?Stay tuned!

#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。





77 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!