搜尋
  • Admin

7成命中2倍值搏 係咪好吸引?(蔡嘉民)




上一次專欄提到送2條策略俾大家,大家千其唔好盲中中就咁望邊一個策略回報高就揀邊個。當中教左大家一個重要Concept就係Risk return ratio。就好似小弟身邊有人話佢一個月可以賺很多,十幾個巴仙咁,好多外行人聽倒會當神咁拜。但其實唔洗幾個月已經見佢唔倒,從此退出江湖。因為當世界上最大型最出名嘅對沖基金都係追緊一年30至40個巴仙左右,邊有咁大隻蛤蚧隨街跳,佢分分鐘係面對緊Risk仲大個Return嘅回報。

今期要講嘅係究竟有咩可以令到一個策略有完全唔同嘅Risk return ratio?其實策略邏輯可以完全一樣,但係只需要調整一下策略參數(Parameter)就做倒。舉個例子,一個炒開野嘅人一定唔會唔識嘅技術指標:保歷加通道(Bollinger Bands)。可能有朋友會唔知,解釋一下先。保歷加通道運用統計學上均值回歸嘅概念,用一條信賴區間(Confidence interval),指出未來股價最大機會嘅走勢。

牽涉參數有2個,一個係週期或者叫Timeframe或者Moving window,另一個係標準差(Standard deviation),前者決定平均線嘅敏感度,後者決定通道嘅寬道。通常前者預設參數係20,後者係2個SD。用呢一個Model去Run,市況淡靜有機會可以賺倒錢,但一遇上單邊嘅趨勢市(Trending period),就會遇倒好大嘅Drawdown,直接拖低個Risk return ratio。

呢個時候,有人就會提倡採用一個長啲時間段嘅週期再加上大嘅標準差,例如3/4,令到策略係市況極端時候先入市,相對會避開好多入市陷阱。

問題黎喇,坊間絕對會有大師向你Sell呢一條策略,講到命中率70%,平均Win/Lose ratio去到2倍幾,好吸引。可惜作為一個專業嘅程式交易員可以話你知其實係無咩意義。原因有三:1.佢嘅交易頻率會極低,一年都未必見倒一次,你買完個策略只會想打爛部電腦。2.統計學上,樣本數據(Sample size)太少,唔成為Statistically significant嘅結果,絕不可信,除非背後有原因解釋呢啲極端情況唔會持續,遲啲會講呢個概念。由於字數限制嘅關係,仲有第三個原因,嗰Concept叫做修復時間(Time to recover),下期再續!

#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。


87 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!