今次專欄想講下期權。香港炒期權嘅風氣的確係無海外地區，例如歐美咁盛行，當中一個原因當然係因為有類似嘅產品，例如窩輪、牛熊證咁，所以散戶多數會被商券推廣嘅產品所吸引。另外一個原因係，坊間教期權成日都係集中喺策略上，幾時應該用咩組合，例如睇好應該用long call，或者debit call spread，睇爆邊應該用long strangle等，多數都係停留喺用咩策略嘅層面上討論，但極少會做風險管理嘅教育。
好多朋友炒期指，見倒證券行一張大期收10萬，就以為佢剩係值10萬，就好放心咁炒。其實一張期指貨值(Notional value) 係大約130萬，變相炒緊130萬嘅藍籌股。所以如果個戶口只係得10萬蚊就玩1張大期，睇錯個市2000點就已經輸哂所有錢。如果做返正確做法，唔槓桿的話，戶口130萬先開1張大期，恆指跌到0點，先會輸哂個本。
期權一樣，恆指一張等價期權，依家大約600點，期權金值3萬蚊，感覺上風險唔大，其實一張等價期權嘅貨值已經係半張大期，即係65萬。如果你個帳戶只有10萬蚊，個市向相反方向郁3%，你已經無左2萬蚊，即係帳戶嘅20%。
所以啲人做短倉點解會成日爆倉，係因為唔識得計數，去做好風險管理。例如做一張Short put，可能入市嘅時候，佢delta只係0.2，但風險絕對唔係0.2咁少，downside risk係入價後先一野反映出黎，即係要當佢delta 1咁看待先正確，所以如果唔想做任何槓桿嘅動作，百幾萬戶口做1張short put先係正確操作。
咁你可能會問，咁其他閒置嘅錢拎黎做咩？
答案係，用黎做其他策略囉，無理由一個百幾萬嘅戶口剩係做一個short put策略掛，其他資金可以用黎玩其他資產，例如外匯、商品、債券等等，佢地各自嘅期權市場都相當精彩。
所以，其實衍生工具嘅槓桿唔係用黎加大回報，真正嘅好處係幫你慳錢，咁你嘅錢就可以投入其他商品，實現分散投資。
Comentários