上一篇提到係資金運用方面，期貨會比正股好，因為期貨嘅槓桿效應其實對大戶黎講，係極佳嘅戰鬥工具。係以前嘅文章，曾經花篇幅講過，交易成本方面，因為佣金以及買賣差價（Bid ask spread）嘅緣故，期貨遠比股票好，所以接下來會繼續探究點樣最大化手上嘅資金運用率。
以騰訊作為例子去比較嘅原因係因為，騰訊過去2年同恆指嘅R（相關系數／Correlation coefficient）高達0.742，而且係一隻長升長有嘅好公司，所以作為大藍籌嘅代表，相信無人會反對。講到資金運用率，上次計過數，除非恆指升1%，騰訊平均都升4%，否則期貨一定比較抵玩。「抵玩」嘅定義唔好理解錯為一定賺！而係指有著數。你會話，喂琴日恆指無點郁，但騰訊咪升左4%囉？呢個Data我地稱之為Outlier（離群值）。
咁點解會話恆指升1%，騰訊升4%機會唔多呢？因為一隻指數成分股同指數嘅關係，我地會睇Beta coefficient（啤打／貝塔系數）。若果一隻股票Beta值有2，代表指數升1%，佢理論會升2%。而騰訊過去2年嘅Beta為1.023，恆指升跌10%，騰訊理論都係升跌10%。唔係講笑，個數字比我預期低，明明平時嘅觀察騰訊升多好多架喎，點解嘅？
再深入少少講，其實恆指同騰訊之間係有一條Equation可以計。唔好誤會，唔係講指數因子或者騰訊佔指數比重！呢度指嘅公式係做左線性回歸（Linear regression）後得倒嘅公式，y=1.023x+0.692。
用法係將恆指嘅升幅放落x，就會知，大市升幾多，騰訊通常都會郁幾多。眼利朋友會留意倒公式尾部有個數，0.692，呢個就係導致我地覺得騰訊會升得勁過恆指嘅原兇。意思係即使恆指橫行，騰訊都會升0.69%！而恆指跌1%，騰訊只會跌0.31%！呢個就係所謂嘅Alpha。當你做個簡單Alpha策略，揸騰訊沽期指，過去2年每日會賺嘅，就係呢0.69%喇。我地試下將呢0.69%都計算在內。假設你係神，你知道聽日個市會升1%，而你手上只有10萬蚊，騰訊會同恆指，你會點揀？
將1%放入x，再加0.69%，得出騰訊會升1.69%，按照大路嘅孖展率，3倍，共Long 30萬貨值，可以賺$5070，而Long期貨共145萬貨值，可賺$14500。當然，如果你完完全全唔知聽日升定跌，唔洗唸，當然揸700啦。對於對沖基金嘅交易程式黎講，期指係不二之選。
利申，唔係叫大家10萬買張大期，所以下次會從風險管理角度解構，期指係唔係輸無限嘅迷思。
作者簡介：對沖基金程式交易操盤手，求學時期上堂做backtest多過聽書，畢業前更於全中國程式交易比賽中勝出，擊敗一眾來自清華、北大的Rocket Scientists。
縱橫市場逾10年，玩遍全球資產，邁向財務自由。