上一篇講到，北水近年尾瘋狂流入，上期推斷嘅原因有兩個，第一係佢地係做緊部署，就好似正常投資者嘅角度咁，買一啲佢地覺得未來會升嘅野。其二係佢地只係運用緊佢地龐大嘅購買力，有節奏咁買港股，務求透過市場微觀結構（Market microstructure）嘅購買力量不平衡（Purchasing power imbalance）製造人造牛市。而第三點就係，搶奪港股定價權。
中央結算系統（CCASS）內，會發現「中國証券登記結算有限責任公司」，同埋佢嘅英文版”CHINA SECURITIES DEPOSITORY AND CLEARING”。如果想睇內地資金揸緊幾多持股量，就可以將2個Participants加埋，會發現大媽過去3年愈揸愈多。當內地愈Hold愈多就愈有Say。終有一日，大價股都會好似好多細隻野咁貨源乾哂。到時佢地想隻股咩價，都有一定程度嘅話事權。不過有人會問，究竟係邊個係咁買，係咪真係大媽呢？搞清身分，知己知彼會有助我地去推敲背後動機。
尚且唔講去查下持倉睇邊個大手買入，按常理做個逆向思維，大家多唔多聽倒身邊嘅香港師奶會用滬股通嘅渠道，去買大陸股？唔係話一定無，但會係少之又少。原因之一係香港大價股升咁多，買港股都買唔切啦，少有地會無啦啦分一部分閒錢出黎買大陸。更重要其實係因為政治風險因素，所以多數散戶投資者會傾向炒返自己地方嘅野，始終一定會熟悉啲。會落黎Shopping嘅，絕對係內地嘅機構投資者。
做完一大輪數據分析之後，發現係有支持第一個論點嘅證據。發現大量流入資金後，如果跟住買入成績會幾唔錯，3年回測入面年化夏普比率（Annualized Sharpe ratio）接近2。可以睇得出內地機構投資者的確有做功課。可以推測佢地有自家嘅預測模型（Prediction model）去估港股大市。
字數有限，下回續。
作者簡介：對沖基金程式交易操盤手，求學時期上堂做backtest多過聽書，畢業前更於全中國程式交易比賽中勝出，擊敗一眾來自清華、北大的Rocket Scientists。縱橫市場逾10年，玩遍全球資產，邁向財務自由。