繼上一篇專欄講到，成日都有都市傳說講邊嗰邊嗰大師有一約條獨門秘方，用某兩條平均線就可以走遍十年股市，坐係度等數銀紙。但其實我地呢啲程式交易員，mouse click 2吓，已經搵倒。或者會聽倒坊間某某人講，如果個市企得穩，就追啦，企唔穩就要向下睇，講埋哂啲阿媽係女人嘅野。一係就話升埋呢浸，賺埋個尾水就反手，但往往一尾就尾左幾個月。其實程式交易除左可以係一瞬之間搵倒比較有優勢嘅策略之外，仲可以免除財演模凌兩可嘅投資建議。
呢度涉及一個非常重要嘅技術，英文係Backtesting,中文名仲型啲，叫回溯測試。回溯測試就係將你嘅策略邏輯放諸係歷史上運行，透過資產曲線/收益曲線（Equity curve/PnL curve）俾你可以一目了然，知道究竟佢賺唔賺倒錢。
問題黎喇，如果我手上有2個策略可以送一個俾你，你會點樣揀？10萬本金去買期指，注碼由頭到尾一樣。甲策略一年可以賺100萬，中途試過由賺緊40萬跌落賺20萬之後再上100萬。乙策略一年賺50萬，中途最大回撤（maximum drawdown）係由賺25萬跌落賺20萬。
多數人會直接揀甲策略，大拿拿100萬喎，買唔倒海之戀都買倒架未加稅嘅Tesla啦。但其實風險回報比（risk return ratio）呢一個概念對於程式交易員黎講係極其重要。甲策略中途由40萬跌落20萬感覺上係賺少左啫，但其實絕對有可能你嘅策略一開波已經遇倒阻濟，一個唔好彩就經歷呢個非常階段。10萬蚊起步嘅你，已經輸到按金都俾唔起不突止，本都無埋。再無機會經歷去到100萬嘅光輝歲月。
所以數一數手指，甲策略賺100萬中途跌20萬，一年嘅風險回報比就係5倍；而乙策略50萬除去5萬，風險回報比係10倍！你依家識揀啦？下期見！
作者簡介：對沖基金程式交易操盤手，求學時期上堂做backtest多過聽書，畢業前更於全中國程式交易比賽中勝出，擊敗一眾來自清華、北大的Rocket Scientists。縱橫市場逾10年，玩遍全球資產，邁向財務自由。