搜尋
  • Admin

期指都可以去槓桿化?(蔡嘉民)


上一篇提到風險管理,解構點解咁多人會覺得炒期指咁危險。我地可以計一計佢嘅貨值(Notional value),再配合VAR嘅計算,就可以搵出究竟幾多錢嘅倉,應該揸幾多張期指喇。就好似投資者要最少有1球鬆啲,先可以炒1張大期咁大把。風險管理係有清楚明確嘅公式可以計,唔好再睇心情而去決定開幾多張期指喇。而呢幾期要點出嘅重點,係股票同期貨係可以一視同仁,無論上期嘅風險計算,或者今集嘅回報計算。

程式交易員、或者量化分析師嘅每日工作都離唔開評估一個策略好唔好。我地係大行入面計股票策略同計期貨策略一樣,會望住佢地嘅貨值黎計,150萬盈富基金就係等同1張大期。坊間有2種計法,其中一種係用按金/保證金計算期貨嘅回報。例如1張大期9皮野,市升500點,賺2萬5蚊。總共有27%利潤,因為將25,000除去90,000。而大行內部做法係會習慣將25,000除1,500,000,係1.7%左右。

原因係,我地經常會測試一個策略佢過去幾年時間嘅表現係點。如果你用9萬蚊去計數,有機會會製造左個策略愈黎愈好嘅感覺。舉例,假設恆指20000點嘅時候,頭半年佢升18%,你賺3600點,亦即180,000蚊,會睇成200%回報。當下半年恆指再升18%嘅時候,就係4250點,亦即21萬左右,如果計數時,分母係90,000蚊,你會睇成賺236%,看似自己下半年賺勁左,但其實恆指升幅無變過。

你可能會話,港交所見到恆指升,會跟住調高期指按金水平架喎,但港交所調整往往係慢過個市一步,而且唔會追得足恆指嘅升幅。再者,回溯測試(Backtest)要納入港交所歷史按金水平係比較麻煩,即使計齊哂,都未必會準確估倒佢未來幾時會調高調低,所以用保證金去計算回報或風險,有可能為自己嘅回測帶來左不確定性。所以期指同股票一樣,大行都習慣用貨值去評估回報。

#財演算法 #蔡嘉民

作者簡介:對沖基金程式交易操盤手,求學時期上堂做backtest多過聽書,畢業前更於全中國程式交易比賽中勝出,擊敗一眾來自清華、北大的Rocket Scientists。縱橫市場逾10年,玩遍全球資產,邁向財務自由。

106 次瀏覽

© 2020 by Jarvis Technology Company Limited

Hong Kong | info@techjt.com| 852-9499-7562

  • Facebook Social Icon

Like us on Facebook!