今期開始教大家創造一個交易策略，你以後唔會再問幾時可以返家鄉。
之前嘅專欄分別講過，睇年回報（Annual Return）去判定一個策略好壞係錯的；齋睇勝率（Win Rate）同值搏率（Win/Lose Ratio）都係錯嘅；反而最大回撤（Maximum Draw down）同埋修復時間（Time To Recover）先係要最需要集中解決嘅因素。我地行內揀策略都係一樣，寧願揀修復時間盡短嘅，都唔要高回報。
曾經試過有策略去到年回報高過300%，最大回撤31%，我最後都放棄左，推左一個年回報16%，MDD 0.27%嘅策略上場。因為後者回報風險比係60。關鍵係只要做19倍槓桿，一年都可以有300%，最大回撤放大後都係得5個巴仙，安全到極，選擇絕對正確。
成日都會聽倒好多師奶打電話去問股票，或者周圍問人幾時返家鄉，其中一個解決方法就係由交易密度做起，提高交易頻率。做回溯測試一定要決定嘅就係交易密度（Trading Interval/Timeframe），由1分鐘到1日都常見。我會提倡愈短愈好，因為一個賺錢嘅策略，做得愈多，愈著數。成日有財演估今個月或者咩咩2017上半年會點，下半年又會點。就算俾你中，都只係1個月賺1次，有意思咩？同一時間，大戶（泛指機構投資者）做嘅係1日幾十個交易，1個月1000條trades。假設功力相同，勝率一樣，1個月賺多散戶1000倍。
1個月1000條trades去擴闊利潤，炒即日鮮嘅人，人手都無可能達到，一定要靠程式交易。更何況點解仲會有長揸蟹貨嘅師奶坐艇唸住可以盡快翻家鄉，靠股票發達？
選擇交易密度係一門學問。做個比較俾大家睇。通常我用1分鐘圖，用1年數據以恆指期貨計，唔計夜期，總共有94000分鐘可以俾策略大展拳腳。如果你嘅策略係睇日線嘅，就要375年先達到同樣嘅統計顯著性（Statistical Significance）。
你可能唸，不如推細到去用每一跳嘅交易（Tick）做測試，咁咪賺盡市場？其實選擇適當嘅交易密度大分有3大決定因素，1：市場本質；2：策略本質；last but not least，交易成本。下回分解！
作者簡介：對沖基金程式交易操盤手，求學時期上堂做backtest多過聽書，畢業前更於全中國程式交易比賽中勝出，擊敗一眾來自清華、北大的Rocket Scientists。縱橫市場逾10年，玩遍全球資產，邁向財務自由。