上期提到用啤打系數（Beta coefficient）搵出指數同指數成分股之間嘅關係，同埋再深入啲剖析點樣去提高資金運用率。無錯，講白少少就係用槓桿（Leverage）。有得用槓桿的話，何樂而不為？可能大家一聽倒孖展（Margin）同埋槓桿難免會有少少反感。因為成日聽到啲用孖展嘅人，唔係俾人斬倉，就係欠人周身債。究竟點解呢件大戶利器，會導致咁多人走火入魔呢？以下就用風險管理嘅角度同大家探討一下。
首先，時不時都會見倒有朋友一旦有10萬蚊，就會用成8至9皮買股票。當佢轉玩期指果陣，又會如是者，有10皮就買5張細期，或者1張大期。下場只有2個，一係就好似中六合彩咁，突然間好富有；一係就輸到俾人斬倉。可惜無論股票定期貨都好，要認清有10皮就用10皮去盡係極危險嘅事。
其次，我地要學一個字叫做Notional value（名義價值/名目值/貨值），股票貨值就好易計。買10萬蚊平保，就係10萬蚊貨值。但期貨貨值係將Underlying price（標的價格）乘Contract size（合約大小），恆指期貨為例，29800乘以50，等於149萬。用現時港交所公佈嘅按金$96398，用9萬零蚊買1張期指，其實變相係做左1球半嘅股票，極其危險。一個唔小心，恆指向你估錯嘅方向郁5%，10皮入面就已經輸左7皮野。
咁我地應該點做好？呢度要認識另一個字，叫做VAR（Value at risk），中文係風險價值。簡單講，你可以知道你手上買賣嘅東西，極大部分日子，一日最多會變動嘅幅度。每個產品只要你有齊佢嘅歷史數據，你就可以計倒佢個VAR。例如恆指4年95%VAR係1.65%。簡單玩法係，你事先設定一個你單日最多承受倒嘅虧損，例如係2%。先將自己個倉嘅資金，乘以單日最多承受倒嘅虧損，再除去95%VAR，例如100萬倉，1,000,000乘0.02除0.0165，等於1,212,121。
解讀方式係，如果你有1球，其實充其量只適合買1球2貨值嘅恆指，所以買1張大期的話，已經超出左你嘅風險控制範圍，所以10萬蚊買1張大期危險並非在於期貨嘅孖展或槓桿，而係投資者本身。下期再詳細講。
作者簡介：對沖基金程式交易操盤手，求學時期上堂做backtest多過聽書，畢業前更於全中國程式交易比賽中勝出，擊敗一眾來自清華、北大的Rocket Scientists。縱橫市場逾10年，玩遍全球資產，邁向財務自由。